काठमाडौं।
विश्व फुटबलको सर्वोच्च निकाय फिफाका अध्यक्ष जियानी इन्फान्टिनोले फिफा प्रतियोगिताहरूमा निजी लगानीकर्ताहरूलाई साझेदारी दिने विवादित योजना औपचारिक रूपमा फिर्ता लिएको बताउनुभएको छ ।
यो योजनाका कारण अन्तर्राष्ट्रिय फुटबल जगतमा तीव्र मतभेद र ध्रुवीकरण बढेको कारण फिर्ता लिएको उहाँले बताउनुभयो । यो विवादित प्रस्तावले आफ्नो मूल उद्देश्य पूरा गर्न नसक्ने स्पष्ट भएपछि फिफाले यसलाई अगाडि नबढाउने निर्णय गरेको उहाँले घोषणा गर्नुभएको छ । तर, यो योजना फिर्ता लिइए पनि यसले सिर्जना गरेको राजनीतिक धक्का र फिफा नेतृत्वप्रतिको अविश्वास भने साम्य भएको छैन ।
यस घटनाले इन्फान्टिनोको अध्यक्ष पद नै धरापमा पारेको छ । यो सम्पूर्ण विवादको सुरुवात फिफाले आफ्ना विश्वकप प्रतियोगिताहरूको २० प्रतिशत व्यापारिक शेयर निजी लगानीकर्तालाई बेच्ने प्रस्ताव अघि सारेपछि भएको थियो । फिफाले २० अर्ब डलर उठाउने लक्ष्यसहित आफ्ना व्यावसायिक अधिकारहरू निजी क्षेत्रलाई हस्तान्तरण गर्ने योजना तयार पारेको थियो ।
यस योजना अन्तर्गत ‘फिफा फरवार्ड इन्टरप्राइज’ (एफएफई) नामको नयाँ व्यापारिक सहायक कम्पनी स्थापना गर्ने तयारी थियो । यो नयाँ कम्पनीमा पुरुष तथा महिला विश्वकपका साथै क्लब विश्वकपका प्रसारण अधिकार, प्रायोजन, टिकट बिक्री र लाइसेन्सको व्यवस्थापन गर्ने जिम्मेवारी राखिएको थियो । फिफाले यस कम्पनीको २० प्रतिशत शेयर निजी लगानीकर्तालाई बेच्ने तयारी गरेको थियो ।
यो योजना सार्वजनिक हुनेबित्तिकै युरोपेली फुटबल महासंघ (युइएफए), विश्वका शक्तिशाली फुटबल क्लबहरू, विभिन्न राजनीतिक व्यक्तित्वहरू र प्रशंसकहरूले यसलाई ‘सार्वजनिक सम्पत्तिको खतरनाक निजीकरण’ भन्दै कडा विरोध गरेका थिए ।