काठमाडौं
खर्च कटौतीको उद्देश्यले राष्ट्रपति र संसदीय चुनाव एकैदिन गराउने सरकारी प्रस्तावलाई माल्दिभ्सका मतदाताले जनमतमार्फत अस्वीकार गरेका छन् ।
हिजो सम्पन्न जनमत सङ्ग्रहको आधिकारिक नतिजाअनुसार ६८ दशमलव ७७ प्रतिशत मतदाताले प्रस्तावको विपक्षमा मतदान गरेका अन्तर्राष्ट्रिय समाचार संस्था एएफपीले जनाएको छ । निर्वाचन आयोगका अनुसार झन्डै २ लाख ९४ हजार मतदाता रहेका माल्दिभ्समा झन्डै दुईतिहाइले मतदानमा सहभागिता जनाएका थिए ।त्यही दिन सम्पन्न स्थानीय परिषद् चुनावले पनि सत्तारूढ पक्षका लागि निराशाजनक सन्देश दिएको छ । राष्ट्रपति मोहम्मद मुइज्जुको पिपुल्स नेशनल कङ्ग्रेसले अपेक्षित सफलता हासिल गर्न सकेन भने प्रमुख विपक्षी माल्दिभियन डेमोक्रेटिक पार्टीले राजधानी माले र दोस्रो ठूलो क्षेत्र अड्डुको प्रमुख परिषद्मा विजय हासिल गरेको छ ।राष्ट्रपति मुइज्जुले सामाजिक सञ्जाल एक्समार्फत चुनाव परिणामलाई सम्मानपूर्वक स्वीकार गर्दै विजेताहरूलाई बधाई दिनुभयो । उहाँले देश आर्थिक चुनौतीबाट गुज्रिरहेका बेला खर्च घटाउने उपायका रूपमा दुवै राष्ट्रिय चुनाव एकैपटक गराउने प्रस्ताव अघि सार्नुभएको थियो । यसबाट झन्डै ८० लाख अमेरिकी डलर बचत हुने दाबी गरिएको थियो ।प्रस्तावअनुसार वर्तमान संसद्को कार्यकाल झन्डै पाँच महिना घटाएर सन् २०२८ सेप्टेम्बरमा हुने राष्ट्रपति चुनावसँग मिलाउने योजना थियो । तर मतदाताले यसलाई समर्थन नगरेपछि यो योजना कार्यान्वयन नहुने भएको छ ।यसअघि सरकारले सन् २०२४ मा अन्तर्राष्ट्रिय मुद्राकोषको बेलआउट अस्वीकार गर्दै आन्तरिक खर्च कटौतीको नीति अघि सारेको थियो । त्यसक्रममा राष्ट्रपतिको तलब आधा गर्ने निर्णयसमेत भएको थियो ।